ՀՀ առևտրաարդյունաբերական պալատին (ՀՀ ԱԱՊ) կից մշտապես գործող արբիտրաժային հաստատությունը ստեղծվել է 2007թ.-ին: Մեր հաստատությանը վերապահված վեճերի լուծումն իրականացնում են ՀՀ ԱԱՊ հաստատած ցանկում ընդգրկված արբիտրները, որոնք ընտրվել են` հաշվի առնելով նրանց գիտելիքների հարուստ պաշարը, մասնագիտացումը և իրավունքի բնագավառում կուտակած փորձը: «Առևտրային արբիտրաժի մասին» ՀՀ օրենքի իմաստով «առևտրային» հաuկացությունը, առանց սահմանափակման, մասնավորապես ներառում է բանկերի կամ այլ ֆինանսական կազմակերպությունների և նրանց հաճախորդների միջև կնքված գործարքներից բխող կամ դրանց հետ կապված վեճերը, ապրանքների մատակարարման և փոխանակման ու ծառայությունների մատուցման, առևտրային ներկայացուցչության կամ գործակալության, ֆակտորինգի, վարձակալության, լիզինգի, աշխատանքների կատարման, խորհրդատվության, նախագծման, լիցենզային, ներդրման, ֆինանսավորման, ապահովագրության, շահագործման կամ կոնցեսիայի, համատեղ ձեռնարկատիրության կամ արդյունաբերական, ձեռնարկատիրական համագործակցության այլ ձևերի, ծովային, օդային, երկաթուղային և ավտոմոբիլային փոխադրումների հետ կապված իրավահարաբերությունները:

Հայաստանի Հանրապետությունը 1997թ. միացել է 1958 թվականի հունիսի 10–ին Նյու Յորք քաղաքում ստորագրված` «Օտարերկրյա արբիտրաժային որոշումների ճանաչման և կատարման մասին» կոնվենցիային: Կոնվենցիայի ուժով ՀՀ ԱԱՊ կից մշտապես գործող արբիտրաժային հաստատության արբիտրաժային վճիռները ենթակա են ճանաչման և կատարման Նյու Յորքի կոնվենցիայի մասնակից բոլոր պետություններում, ինչը ևս մեկ առավելություն է պետական դատարանների վճիռների նկատմամբ: